Хитой армияси генераллари Пекин шаҳрида сентябрь ойи аввалида бўлиб ўтадиган Иккинчи жаҳон уруши тугашининг 70 йиллигига бағишланган парадга тайёргарлик кўргани сабабли вазн ташлашди. Бу ҳақда The South China Morning Post нашри хабар берди.

“18-19 ёшли аскарларга қараганда генералларда жавоб реакцияси, чаққонлик ва жисмоний куч етишмаяпти. Бироқ улар шафқат сўраганлари йўқ, балки аксинча, ўз малакасини энг яхши кўринишда намоён этишни истайди ва шунинг учун қўшимча машғулотларда иштирок этмоқда”, – деди ҳарбий хизматчиларни байрамона юришга тайёрлаётган капитан Фэнг Кайчунь.

Нашр маълумотига кўра, кўплаб генераллар ўртача 5 килограммдан озишган. Улар қуёш нурлари остида тўлиқ ҳарбий либос кийган ҳолда оддий аскарлар билан барча репетицияларда иштирок этмоқда.

Иккинчи жаҳон уруши тугалланганига бағишланган парад 3 сентябрь куни Пекиннинг Тяньаньмэнь майдонида бўлиб ўтади. Унда 12 минг аскар, 50 генерал, 10дан зиёд давлат раҳбарлари иштирок этади.

Шунингдек, томошабинларга 500дан ортиқ ҳарбий техникалар, шу жумладан, жанговар самолётлар намойиш этилади.