Apple компанияси Tesla собиқ катта муҳандиси Жейми Карлсонни ёллади. Бу ҳақда Reuters агентлиги хабар бермоқда.
Карлсон Tesla’да ҳайдовчисиз бошқариладиган машиналар лойиҳалари устида ишлаган. Ундан ташқари, шу соҳага ихтисослашган яна 6 мутахассис Apple’га ўтди. Жумладан, компания Volkswagen концернидан муҳандисларни, Nvidia’нинг автомобилларда объектларни таниш тизими ишлаб чиқарувчи бўлинмаси мутахассисларини, шунингдек, Fiat Chrysler Automobiles альянсининг топ-менежерини ҳамда тадқиқот институтларидан бир қанча олимларни ишга ёллади.
Илгари Tesla раҳбари Илон Маск Apple унинг ходимларига меҳнат шартномасини имзолаганлик учун 250 минг доллар бонус беришга ва иш ҳақини 60 фоизга кўтаришга ваъда берганини маълум қилган эди. Шунингдек, Apple A123 Systems, Samsung, LG, Panasonic ва Toshiba мутахассисларини жалб қилишга урингани маълум бўлди.
Компания автопилотли машина яратиши ҳақидаги гап-сўзлар 2015 йил бошида тарқалди. Бундай турдаги биринчи машина 2020 йили ишлаб чиқарилиши кутилмоқда. Лекин бренд вакиллари ҳали бирор марта ахборотни расман тасдиқлаганлари йўқ.