Душанбеда суд Амирбек Исаевни ўз туғилган кунини оила даврасида эмас, балки кафеда нишонлагани учун жаримага тортди, деб хабар бермоқда Toptj.com нашри.

Исаев “Тожикистон Республикасида анъана ва удумларни тартибга солиш тўғрисида”ги қонуннинг 8-моддасини бузганликда айбланмоқда. Ушбу моддага кўра, туғилган кунларни оила даврасида нишонлаш белгилаб қўйилган.

Исаевга бундай айбловлар фейсбукдаги саҳифасида чоп этган фотосуратларига асосланиб қўйилган. У ижтимоий тармоқ орқали туғилган кунида бўлган дўстларига миннатдорчилик ҳам билдирган.

Исаевнинг ўзи ҳеч нимани нишонламагани, шунчаки ўз севгилиси билан торт олгани бориб, сўнгра дўстлари “мафия” ўйинини ўйнаш учун йиғиладиган пабга кириб ўтишганини айтган. Улфатчилик пайтида дўстлари Исаевнинг қўлидаги тортни кўриб, уни татиб кўришни сўрашган. Исаев ва унинг дўстларига хизмат кўрсатган паб официанти судда Исаевни кимдир туғилган куни билан табриклаганини эшитмаганини айтган.

Бироқ суд ҳаками официантнинг гапларини ишонарсиз деб топиб, йигитни 4 минг сомонийга (жорий курс бўйича тахминан 600 доллар) жаримага тортган.

Жабрланувчи фейсбукдаги саҳифасида жаримани тўлашга бундай катта пули йўқлигини ва суднинг қарори устидан юқори инстанцияга шикоят қилишини айтган.