Ўзбекистон президенти Ислом Каримов бошчилигидаги делегация 3 сентябрь куни Пекинда бўлиб ўтадиган ғалаба парадида иштирок этади.

Иккинчи Жаҳон урушидаги ғалаба, шунингдек, Хитой халқининг Япония агрессиясига қарши курашдаги ғалабанинг 70 йиллиги муносабати билан ўтказиладиган ушбу парадда 30дан ортиқ мамлакат раҳбарлари иштирок этиши маълум қилинди.

ХХР Давлат кенгаши девонхонасининг маълум қилишича, тадбирда жами 49 мамлакат вакиллари иштирок этади.

3 сентябрь куни Тяньаньмэнь майдонидан 12 минг аскар ва зобит парад билан ўтади. Парадга, шунингдек, 200 донадан ер усти техникаси ва самолёт жалб қилинади.

Парадни тайёрлашга раҳбарлик қилаётган генерал-майор Цюй Жуйнинг маълум қилишича, парадда иштирок этадиган техниканинг 84 фоизи биринчи марта намойиш этилади.