Жон Дейли «The Silk Road Reporters» нашри порталида чоп этилган «Зилзилаларга қарамай, Роғун ГЭС мега-лойиҳаси ишлари давом этмоқда» номли мақоласида Роғун ГЭС қурилиши якунига етган тақдирда юзага келиши мумкин бўлган экологик ва ижтимоий-иқтисодий муаммоларни шарҳлади.

Мазкур лойиҳада Вахш дарёсида йирик тўғон қурилиши кўзда тутилган бўлиб, у қўшни Афғонистонга электр энергияси экспорт қилишни кўзлаётган Тожикистон президенти И.Раҳмоннинг «дурдона режасига» айланди. 2013 йилда Тожикистон соатига 17,09 млрд. киловатт энергия ишлатиб, Афғонистонга 1 млрд. кВт. Энергия экспорт қилган.

Тожикистонлик расмий вакилларнинг қайд этишича, Роғун ГЭС йилига 13 млрд. киловаат-соат электр энергияси ишлаб чиқарадиган Марказий Осиёдаги энг йирик гидроэлектр станция бўлиши керак. Бироқ, мазкур лойиҳанинг амалга оширилиши қишлоқ хўжалиги ўсиш мавсумида сувдан фойдаланиш имкониятига боғлиқ бўлган Ўзбекистон, Қозоғистон ва Туркманистон каби қўшни давлатларнинг миллий манфаатларига таҳдид солмоқда. Сув ресурслари танглиги муаммоси билан бирга, Роғун ГЭС шунингдек, сейсмик фаол ҳудудда жойлашгани сабабли экологик таҳдидлар манбаига айланиши мумкин.

"Телеграф.уз" нашрининг ёзишича, жорий йилнинг 20 май куни юз берган маркази Роғун яқинида жойлашган Рихтер шкаласи бўйича 5,5 балли зилзила мамлакатнинг бир нечта ҳудудидаги турар-жой ва маъмурий биноларга зарар етказиб, кенг кўламли кўчкига сабаб бўлди. АҚШ геология хизматининг маълумотларига кўра, 2013 йилдан буён Роғунга яқин ҳудудларда 4 ва ундан баланд магнитудали 250та зилзила, шунингдек, 6 магнитудали 12та зилзила қайд этилган.

Мақола муаллифи Жон Дейли маблағ етишмаслиги, қўшни давлатларнинг салбий муносабати ва хавфли сейсмик фаолликка қарамасдан, И.Раҳмон аввалгидек ўзининг «буюк гидроэнергетик лойиҳасини» амалга оширишга уринаётганини таъкидлаган.