Канаданинг Квебек вилоятида гидроплан ерга қулаши оқибатида 6 йўловчи ҳалок бўлди, деб хабар бермоқда Montreal Gazette нашри.

Ҳалок бўлганлар 4 нафар Буюк Британия фуқароси, франциялик бир сайёҳ ва учувчидан иборат.

Гидропланга эгалик қилувчи Saguenay Air авиакомпаниясининг раҳбари Жин Тремблейнинг айтишича, учувчи катта тажрибага эга бўлган ва компанияда 14 йилдан бери ишлаб келган.

Фожиа Ле-Бержерон муниципалитетидан 6 км узоқликда содир бўлди. Гидропланнинг қидирув ишлари ҳудуднинг зич ўрмонга эгалиги туфайли қийинлашган.