Уч томонлама учрашувлар натижалари тўғрисида сўзлаган Ангела Меркель украин можароси томонлари ўт очишни тўхтатиш тартиби бузилаётганидан шикоят қилаётганини айтиб ўтди. Унинг фикрича, “Минск-2” шартномасининг барча шартлари бажарилиши шарт.

“Украинада ўт очишни тўхтатиш тартибига риоя қилинмаяпти. Томонлар мунтазам равишда тинчлик келишуви бандларининг бузилаётганини маълум қилмоқда, чегарадош ҳудудлардан оғир артиллерия олиб чиқилмаяпти”, — деди Меркел Германия пойтахтида Франция ва Украина президентлари Франсуа Олланд ва Пётр Порошенко билан бўлиб ўтган учрашув натижаларига бағишланган брифингда.

Канцлернинг сўзларига кўра, Минскда имзоланган келишувнинг барча, жумладан, чегара ҳудудларидан оғир артиллерияни олиб кетиш шарти бажарилиши лозим. Украина томони бу вазифаларни бажаришга тайёр.

2015 йил 12 февралда имзоланган келишувга кўра, томонлар ўт очишни тўхтатиши, чегара ҳудудларидан оғир артиллерияни олиб кетиши, шунингдек, Украина конституциясидаги ҳокимиятнинг децентрализациялашуви (марказлашган системадан марказлашмаган системага ўтиш ёки ўтказиш), шунингдек, “Донецк ва Луганск вилоятларининг алоҳида туманлари” махсус мақоми мустаҳкамлаб қўйилиши лозим эди.