Россия президенти Владимир Путин бугун Иордания қироли Абдулла II ва Абу Даби валиаҳд шаҳзодаси Муҳаммад ал-Наҳайян билан учрашув ўтказади. Учрашув чоғида икки томонлама ҳамкорлик масалалари, шунингдек, ИШИД ва Сурия инқирози кўриб чиқилади.
Иордания қироли Россияга Путиннинг таклифи билан ташриф буюрди. Бу унинг 2001 йилдан буён Россияга 14-ташрифи бўлади. Охирги марта у Москвага 2014 йил 2 октябрида келган эди.

Таъкидланишича, икки томонлама учрашувда кўтариладиган бирламчи масала қўшма лойиҳалар бўлади. Бундан ташқари, маданий-гуманитар соҳада иорданиялик талабаларнинг Россия олийгоҳларида ўқиши учун квоталар оширилиши масаласи кўриб чиқилади.
Абу Даби шаҳзодаси эса МАКС-2015 авиасалонига ташриф буюради ҳамда ушбу тадбир доирасида Россия раҳбари билан учрашув ўтказади. Уларнинг учрашувида биринчи навбатда энергетика соҳасидаги ҳамкорлик муҳокама қилинади.

Эслатиб ўтамиз, 25 август куни Москва вилоятидаги Жуковка шаҳрида Халқаро авиацион-космик салони – МАКС-2015 старт олади. Тадбир 30 августга қадар давом этади.