Қозоғистон пойтахти Остона шаҳрида фаолият олиб борувчи тадбиркор Ержан Турсинбек зебра сутидан пуштиранг қимиз тайёрлашни йўлга қўймоқчи. Бундай ғоя унинг Кенияга сафари вақтида пайдо бўлди, дея хабар бермоқда “Экспресс К” нашри.

Найроби миллий боғидан унча узоқ бўлмаган жойдаги фермада Турсинбек зебра сути таъмини тотиб кўрди.

“Унинг мазаси бия сутини эслатади. Ранги эса пушти. Мен маҳаллий аҳолидан зебра сутини ачитиш йўли билан ундан бирор ичимлик тайёрлашини сўрадим. Маълум бўлишича, зебра сути улар учун худди биздагидек камёб экан. Кенияда зебралар бир нечтагина фермаларда тадқиқот учун кўпайтирилади”, – деди қозоғистонлик тадбиркор.

Ўз юртига қайтганидан сўнг Ержан зебра сутидан қимиз тайёрлаб кўришга қарор қилди. Албатта, бу камёб ичимлик бўлиб, ҳамманинг қурби уни ичиб кўришга етавермайди. Ҳозирча тадбиркор зебра сутини Кениядан олиб келадими ёки Қозоғистонда зебра фермасини ташкил этадими, ҳисоб-китоб қилиб кўрмоқда.

“Караганда вилоятида ёввойи қўтослар етиштирилаяпти. Улар сутининг ранги ҳам пушти. Бироқ бу сут қимиз тайёрлашга яроқсиз, боиси улар таркибида шакар миқдори жуда оз”, – дейди тадбиркор. Унинг фикрича, мамлакатда ёввойи қўтослар етиштирилаяптими, демак, зебра фермасини ҳам очса бўлади.