Қозоғистон пойтахти Остона шаҳрида дзюдо кураши бўйича ўтказилаётган жаҳон чемпионатида ҳамюртимиз Ришод Собиров (-66 кг) бронза медалини қўлга киритди, деб ёзмоқда Миллий олимпия қўмитаси ахборот хизмати.

Саралаш беллашувларида Серхио Маттей (Венесуэла), Арсен Хазарян (Арманистон) ҳамда Масаши Эбинума (Япония)ни муддатдан аввал мағлуб этган Ришод, ярим финал йўлланмаси учун кечган баҳсда Жанубий Корея вакили Ан Баулга имкониятни бой бериб қўйганди.

Шундан сўнг, ўтиш мусобақасида бронза медаллар учун курашни давом эттирган Ришод Собиров дастлаб италиялик Элио Вердени, бронза медали учун кечган беллашувда эса мезбонлар вакили Элдос Жумахановни енгиб, жаҳон чемпионатининг бронза медали совриндори бўлди.

Маълумки, мазкур жаҳон чемпионатида 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмаси учун рейтинг очколар ҳам ўйналмоқда. Жаҳон чемпионатида учинчи ўринни эгаллаган Ришод Собиров бронза медалга сазовор бўлиш билан бирга 360 рейтинг очкосига ҳам эга бўлди.