Туркия президенти Ражаб Тойиб Эрдўған вазирлар маҳкамасини шакллантиришда юзага келган инқироз шароитида навбатдан ташқари парламент сайловларини ўтказишга тайёргарлик кўришга кўрсатма берди. Бу ҳақда Эрдўған девонхонаси тарқатган баёнотдан маълум бўлди.
“Партиялар ўртасида конституцияда кўрсатилган муддатлар доирасида ўтказилган музокараларга қарамай, вазирлар маҳкамаси шакллантирилмади, ва бугунги шароитдан келиб чиқиб айтишимиз мумкинки, уни шакллантиришнинг иложи йўқ. Шуни эътиборга олган ҳолда, сайловларни қайтадан ўтказиш ҳақида қарор қилинди”, - дейилади баёнотда.
Президент амалдаги конституциянинг 104 ва 116-моддаларида белгиланган ҳуқуқларидан фойдаланган ҳолда Туркия парламенти раиси Исмат Йилмаз билан музокара ўтказди ва қайтадан сайлов ўтказиш ҳақида қарор берди.
25 август куни эрталаб Эрдўған бош вазир Аҳмад Довудўғли билан учрашади. Тахмин қилинишича, у муваққат ҳукумат шакллантиришга президент мандатини олади.