Каталониянинг «Барселона» клуби жамоа ҳужумчиси Неймарга янги шартномага таклиф қилишни режалаштирмоқда, деб ёзади Британиянинг Daily Mail нашри.

Манбанинг маълум қилишича, Каталония клуби жорий мавсум охирига қадар бразилиялик футболчи билан амалдаги шартномани узайтиришни режа қилган.

Янги шартнома 2021 йилга қадар амал қилиши кўзда тутилган. Агар шартнома имзоланадиган бўлса, Неймарнинг трансферни бекор қилиши учун тўланадиган товон пули 250 миллион еврони ташкил қилади.

Бразилиялик футболчининг амалдаги шартномаси 2018 йилнинг ёзига қадар давом этади.

Эслатиб ўтамиз, сўнгги пайтларда футболчига «Манчестер Юнайтед» жамоаси қизиқиш билдираётгани ҳақида хабарлар тарқалганди.