16 ёшли британиялик қиз Австралияда Фахрийлар куни теракт уюштирмоқчи бўлганини тан олди. Тергов версиясига кўра, қиз ва 14 ёшли ўсмир 25 апрелда нишонланадиган бу кунда теракт амалга оширмоқчи бўлган.

Буюк Британиянинг Манчестер шаҳрида яшовчи қиз ва терактнинг эҳтимолий ташкилотчиси бўлган ўсмир йигит апрелда қўлга олинган. Гумонланувчилар терактда маҳаллий полициячиларни нишонга олмоқчи бўлганлар. Қизнинг ёнидан портловчи восита тайёрлаш бўйича йўриқнома ва бошқа экстремистик рухдаги материаллар топилган.

Қиз вояга етмагани сабабли қўйиб юборилди. ТАСС ахборот агентлигининг маълум қилишича, қиз “ИШИД” террорчилик гуруҳи таъсирига тушиб қолган.

Бу иш Буюк Британияда катта муҳокамага сабаб бўлди. Йигит “энг ёш террорчи” деб аталиб, мамлакатда “ИШИД” тарғиботининг маҳаллий ёшларга кўрсатаётган ҳалокатли таъсири ҳақида янги музокараларни келтириб чиқарди. Буюк Британия ҳукумати маълумотларига кўра, “ИШИД” сафида қиролликнинг камида 700 нафар фуқароси жанг қилмоқда. Уларни асосан муҳожирларнинг Британияда туғилган ва турли радикал имомларнинг таъсирига тушган ёшлар ташкил қилмоқда.