Нефть қазиб олиш ҳажми бўйича дунёда 5-ўринда турувчи Эрон углеводородлар нархининг кескин тушиб кетиши боис 2015 йилда ушбу соҳага деярли маблағ ажратмади. Бу ҳақда Bloomberg агентлиги хабар бермоқда.

Эрон нефть вазири Бижан Номдор Зангонанинг маълум қилишича, 2011-2012 йилларда нефть соҳасига 40 млрд доллар ажратилган бўлса, ўтган йили бу кўрсаткич 6 млрд долларга тенг бўлди.

Вазирликнинг стратегик режалаштириш бўлинмаси бошлиғи Саид Гавомпурнинг айтишича, яқин беш йил ичида бу соҳага 100-500 млрд доллар киритиш талаб этилади.
Санкциялар бекор қилиниши билан Эрон нефть қазиб чиқариш ҳажмини кунига 500 минг баррелга етказишни режалаштирмоқда. Бунда, Зангонанинг фикрича, ОПЕК аъзолари санкциялар бекор қилинганидан сўнг нефть бозорида Эронга улуш ажратиб беришлари зарур.

ОПЕКнинг собиқ раҳбари Нобуо Танаканинг тахмин қилишича, 2040 йилга келиб Эрон нефть бозорида етакчи мавқени қўлга киритади.