"Милан" жамоасининг Марио Балотелли билан тузган шартномасининг баъзи жиҳатлари ошкор қилинди.
Рейтер нашрининг ёзишича, 25 ёшли футболчи билан тузилган шартномада ахлоқ нормаларини назарда тутувчи бандлар ҳам бор.

Эндиликда, Балотелли ўзининг ижтимоий тармоқлардаги аккаунтлари орқали янги жамоаси шаънига тўғри келмайдиган гаплар ёзмаслиги, номаъқул соч турмаклари ва кийимларидан воз кечиши, чекишни ташлаши, тунги клубларга бормаслиги ва машғулотларга кечикмаслиги керак бўлади.

Қайд этилишича, Балотелли билан тузилган шартнома шартлари Италиядаги ҳарбий хизматчилар билан тузиладиган шартномаларнинг бандларидан деярли фарқ қилмайди.

Эслатиб ўтамиз, "Ливерпуль" аъзоси бўлган Марио Балотелли 25 август куни "Милан"га ижарага берилди.
Маълумот учун, Балотелли 2013 йилнинг январидан 2014 йилнинг августигача ҳам "Милан" жамоасида тўп сурганди. У ўз вақтида "Интер" ва "Манчестер Сити" жамоаларида ёрқин ўйинлар кўрсатган.

Қайд этиш керакки, ушбу футболчи доимий равишда жанжалли воқеалар марказида бўлиши билан танилган. У ўйинларда энг кўп сариқ ва қизил карточкалар билан жазоланадиган, ўз жамоадошлари ва мураббийлари билан жанжаллашадиган бадхулқ футболчилар сирасидан ҳисобланади.

Бундан олдинроқ, Балотелли ҳамиша "Милан"га қайтишни ўйлаб юргани ҳақида интервью берганди.