Олма-Отадаги машҳур ресторанлардан бирининг хўжайини банкет ҳақи тўланмагани боис келинни гаровга олиб қолди. Бу ҳақда келин-куёвларнинг гувоҳлигига таянган ҳолда Nur.kz портали хабар бермоқда.

Айтилишича, Мақсут кредитга пул олиб, Навоий кўчасида жойлашган ресторанда 150 кишилик дастурхон ёзган. Тўй харажатлари куёвга 2.15 млн тангага тушган. Пулнинг 70 фоизи тўйга қадар тўлаб бўлинган, қолган қисмини эса ёшлар меҳмонлардан олинган совғалар ва тўёна билан узишни режалаштиришган.

Аммо таклиф қилингаларнинг 30 нафари номаълум сабабларга кўра тантаналарга ташриф буюрмади. Шу боис тўёна режалаштирилганидан камроқ бўлган. Тўй тугаши билан ресторан хўжайини улардан қолган 500 минг тангани тўлашни талаб қилган.

У ҳаттоки эртагача қараб туришни истамай, куёв қарзни қайтармагунга қадар келинни гаровда ушлаб туришини айтган. Мақсут гаровга машинасини таклиф қилишига қарамай, ресторан эгаси келинни эрталабга қадар гаровда ушлаб турган. Мақсут туни билан харидор қидириб, машинани ярим нархига сотиб юборган ва пулларни бериб, рафиқасини озод қилган.
Орадан бир муддат ўтгач, ёшлар ресторан эгасини судга беришган. Суд ишни кўриб чиқмоқда.