Қашқадарё вилоятидаги “Деҳқонобод калий ўғитлари заводи” унитар корхонаси келгусида йилига 10 минг тонна калий гидрооксиди ишлаб чиқаришни режалаштирмоқда. Бу ҳақда “Деҳқонобод калий ўғитлари заводи” унитар корхонаси бош муҳандиси Раҳмат Ўсаров маълум қилди.

Унинг сўзларига кўра, айни пайтда мазкур лойиҳани амалга ошириш ишлари босқичма-босқич давом этмоқда.

“Бугунги кунда Россиянинг “ЗУМК-Инжиниринг” компанияси билан ҳамкорликда йиллик қуввати 1 миллион 400 минг тонна руда бўлган тоғ-кон комплекси, шунингдек, ташқи электр таъминоти объектлари, тирговучлар ўртасидаги масофасига кўра дунёда ягона саналаётган (қарийб 30 километр) осма арқон йўлини қуриш ишлари давом эттирилмоқда. Мазкур лойиҳани ишга тушириш калийли ўғитлар ишлаб чиқариш йиллик ҳажмини 600 минг тоннагача, руда қазиб олиш миқдорини эса 2 миллион 100 тоннагача оширишга имкон беради”, – дея Ўсаров сўзидан иқтибос келтиради ЎзА.

У, шунингдек, муассаса ўтган 5 йил давомида 900 минг тоннадан зиёд биринчи навли калий хлорид ишлаб чиқариб, мазкур маҳсулотнинг 600 минг тоннасини хорижга экспорт қилганини таъкидлаб ўтди.

“Айни пайтда ўғитлар Хитой, Малайзия, Сингапур, Бирлашган араб амирликлари, Вьетнам, Арманистон, Молдова, Туркия, Ангола, Украина ва бошқа бир қатор мамлакатларга экспорт қилинмоқда. Ишлаб чиқариш жараёнида пайдо бўлувчи чиқиндиларни қайта ишлаб, улардан техник тузлар олиш йўлга қўйилди. Келгусида бу миллий корхоналарнинг техник тузларга бўлган талабини тўлиқ қоплашга имкон туғдиради”, – дея қўшимча қилди бош муҳандис.

Маълумот ўрнида, калий гидрооксиди рангсиз нам шимувчи кристалл модда бўлиб, сув билан кучли ишқорий реакцияга киришади. Ундан озиқ-овқат саноатида E525 озуқавий қўшимчасини ишлаб чиқариш, халқ хўжалигида суюқ совун ва бошқа кўплаб калийли бирикмаларни олишда, саноатда зангламас темир (нержавейка) маҳсулотлари тозалаш, ишқорли (алкинли) батарейкаларда электролит ўрнида қўллаш, метан газини олишда, кислота газларини шимдириш ва бошқа кўплаб мақсадларда қўлланилади.

Маълумотларга кўра, жаҳон бозорида ушбу модданинг йиллик ҳажми 2,06 миллион тонна бўлиб, Ўзбекистон АҚШ, Канада, Жанубий Корея, Ғарбий Европа мамлакатлари қаторида энг йирик экспортёрлардан ҳисобланади.