Россия фуқароларининг муҳожирларга нисбатан бағрикенглиги рекорд даражага етди. Август ойида ўтказилган сўровномаларда 41 фоиз респондентлар мамлакатдаги ноқонуний муҳожирлар қонунийлаштирилиши лозим, деб ҳисоблайди.

Шу билан бирга, сўровномада қатнашган россияликлар муҳожирларнинг иш топиши ва уларнинг Россия шароитига мослашувига ёрдам бериш лозим, деган фикрда.
Таҳлилчиларнинг тасдиқлашича, бағрикенглик даражаси мисли кўрилмаган даражада ошган — ўтган 2014 йилда 19 фоиздан камроқ респондентлар муҳожирларни қўллаб-қувватлаган бўлса, 2006 йилдан бу кўрсаткич 15-35 фоиз атрофида бўлган.

Айни пайтда, 40 фоиздан зиёд респондентлар социологлар саволига жавоб берар экан, ноқонуний муҳожирларни мамлакат ҳудудидан чиқариб юбориш кераклигини айтишган.
Мутахассислар муҳожирларга нисбатан муносабат яхшиланиши билан бир қаторда, миллатлараро ва динлараро кескинликнинг кучайганини ҳам қайд этишган.

Сўнгги йилларда одатий ксенофобия (“ўзга”лардан қўрқиш ёки улардан нафратланиш) объектлари (асосан ўрта осиёликлар) ўрни Шарқий Украинадаги ҳодисалар таъсирида янги тоифалар — “фашистлар” ва “Америка таҳдиди” билан алмашаётгани кузатилмоқда.