Уфада оромгоҳда дам олаётган икки нафар 14 ёшли қиз эрмак қилиб ўзларининг ўғирланганликлари ҳақида сохта маълумот бериб, маҳаллий полициячиларни алдади. Бу ҳақда Бошқирдистон Республикаси ИИВ матбуот хизмати сайтида маълум қилинди.

“Бир қиз қўрққан алфозда милиция бўлимига телефон қилиб, уни ва синглисини номаълум эркак ўғирлаганини айтган. Унинг айтишича, эркак уларни ўрмон томонга олиб бориб, машинага ўтказиб ўғирлаб кетиб, ёпиқ хонада сақлаган. Бироздан кейин жиноятчи қизларни озод қилиш учун ўз шартини овоза этган, яъни 2 миллион рубль талаб қилган. Қиз фақатгина жиноятчи ва унинг машинасининг алоҳида белгиларини айта олган”, дейилади хабарда.
Милиция бўлимига келиб тушган ушбу хабар бўйича жиноятчи ва қизларни қидиришга бўлимнинг 50 нафар ходимидан ташкил топган бутун шахсий таркиби отланган, улар бутун ҳудудни айланиб чиқишган, уйларнинг томлари ва ертўлаларини текшириб чиқишган. Жиноятчи машинаси белгилари тасвирланган ахборот барча патрулларга жўнатилган. Йўл полициячилари тасвирланган машинага ўхшаш барча машиналарни текширишган. Бироқ батафсил текширувдан кейин қизларнинг ўғирланиши ҳолати умуман бўлмагани аниқланган.
“Қўнғироқ эгасининг айтишича, у бекорчиликдан телефонни олиб, 02 хизматига телефон қилиб, уларни лақиллатишга қарор қилган. Қизлар балоғатга етмаганлар ишлари бўйича испекторларга шу тариқа эрмак қилишга қарор қилишганини айтишган”, деб таъкидланади ҳуқуқ-тартибот бош бошқармаси матбуот хизматида.
Ушбу воқеа юзасидан текширув ўтказилмоқда. Балоғатга етмаган қизларнинг вакилларини қонун билан белгиланган жавобгарликка тортиш масаласи ҳал қилинмоқда.