Universal Pictures кинокомпанияси хорижий касса йиғимлари бўйича Ҳолливуд рекордини ўрнатди. Айтилишича, у жорий йилда янги фильмлар намойишидан 3.78 млрд доллар ишлаган. Илгариги рекорд (3.73 млрд доллар) бир йилча олдин 20th Century Fox компанияси томонидан қайд қилинган эди.

Компаниянинг бу ютуғини асосан иккита кинолойиҳа таъминлаб берди – “Форсаж-7” ва “Юра даври боғи”. Variety журналининг ёзишича, ушбу картиналар халқаро бозорларда 1.2 млрд ва 983 млн доллар ишлаган.

Улардан кейинги ўринларда “Миньонлар” (670.2 млн доллар) ва “Кулрангнинг эллик туси” (404.1 млн доллар) фильмлари турибди.

“Жорий йилнинг яна тўрт ойи давомида рекорд янада каттариши мумкин”, - таъкидлади кинокомпания вакили.

2015 йил охирига қадар катта экранларга Анжелина Жоли режиссёрлигида Брэд Питт бош ролни ижро этган “Денгиз олдида”, Дэнни Бойлнинг “Стив Жобс” (бош ролда – Майкл Фассбендер) ва исландиялик режиссёр Балтазар Кормакурнинг “Эверест” фильмлари чиқади. Бундан ташқари, Гильермо дель Торонинг “Ол ранг чўққи” хоррори, Найт Шьямаланнинг “Ташриф” триллери ва Майкл Догертининг “Крампус” хоррор комедияси тақдим этилиши кутилмоқда.