Актёр ва режиссёр Антонио Бандерас Британиянинг Сentral Saint Martins коллежи талабаси бўлди, деб ёзмоқда Vogue UK нашри актёрнинг Instagram саҳифасида жойлаштирган суратига ҳавола келтирган ҳолда.

Ижтимоий тармоқда 55 ёшли Бандерас манекенлар фонида (коллеждаги ўқиш асосан мода ва дизайн йўналишига ихтисослашган — Kun) тушган сурати жойлаштирилган.

«Сentral Saint Martins коллежидаги ўқишнинг иккинчи ҳафтаси бошланди. Бу бир вақтнинг ўзида ҳам ҳаяжонли, ҳам жиддий ва ҳам қизиқарли», деб ёзади актёр Instagram`даги сурат изоҳига.

Юқорида номи келтирилган манбада ёзилишича, Бандерас анчадан буён мазкур олийгоҳда таълим олишни режалаштириб келаётганди.

«Менимча бу дунёдаги энг зўр мактаблардан бири. Партага ўтириб, ўзимни яна ёш болалардек ҳис қилмоқдаман. Албатта, ўзимнинг профессионал ишимни ташлаганим йўқ, аммо бу бутунлай янгича йўналиш», дейди Бандерас.

Нашрда Антонио Бандерас коллежнинг айнан қайси факультетида ўқиётганига аниқлик киритиб ўтилмаган.

Сentral Saint Martins Лондонда жойлашган бўлиб, Лондон санъат университетининг (University of the Arts London) бир қисми саналади. Ўқиш истагида бўлганлар бу ерда, актёрлик маҳорати, дизайн, мода, графика йўналишларини танлаши мумкин бўлади. Мазкур коллеж дунёнинг энг машҳур мода йўналишидаги таълим даргоҳларидан бири бўлиб, бу ерда ўз вақтида Жон Гальяно, Стелла Маккартни, Александр Маккуин, Зак Позен, Рикардо Тиши каби машҳур дизайнерлар ўқишган.

Маълумот ўрнида таъкидлаб ўтиш жоиз, Антонио Бандерас шу кунгача олий маълумотга эга бўлмаган. Ёшлигида футболчи бўлишни орзу қилган Антонио кейинчалик актёрлик мактабида таҳсил олишга қарор қилган.