Греция президенти Прокопис Павлопулос 27 август, пайшанба куни мамлакат бош вазири вазифасини вақтинчалик бажарувчи лавозимига янги тайинланган раҳбар номини эълон қилди. Бу ҳақда Reuters ахборот агентлиги хабар тарқатмоқда.

Манбанинг ёзишича, эндиликда мазкур лавозимда Конституцион суд раиси сифатида ишлаб келган Василику Тану-Хрестофилу иш олиб боради. Бунинг натижасида Тану-Хрестофилу Греция тарихида илк аёл бош вазир сифатида тарихда қоладиган бўлди.

Жума кунидан бошлаб у янги лавозимни қабул қилиб олиши керак бўлади.

«Синаспизмос» партияси ва сўл томон радикал Коалицияси етакчиси («Сириза») Алексис Ципрас ўз лавозимидан кетгач, янги парламент сайловларини ташкил қилишни режалаштирганди. Бироқ бу иш амалга ошмай қолганди.

Эндиликда сайловлар сентябрь ойида бўлиб ўтиши режалаштирилмоқда.