Қашқадарё вилоят прокуратураси бўлим бошлиғи Бахтиёр Исматов берган маълумотларга қараганда, охирги ойларда турли корхоналар томонидан ходимларга вақтида иш ҳақининг берилмаслиги билан боғлиқ мурожаатлар ўрганиб чиқилиб, ижобий ҳал қилинган.
Жумладан, “Муборак пахта тозалаш” АЖ ишчиси Р. Содиқовнинг иш ҳақи ўз вақтида берилмагани оқибатида меҳнатга оид ҳуқуқлар бузилаётгани ҳақидаги мурожаатини ўрганиш натижасида 30 нафар ишчининг тўланмай қолган 35.6 млн сўм миқдоридаги иш ҳақлари тўлаб берилиши таъминланди ва АЖ раиси О. Қўзибоевга нисбатан маъмурий жавобгарлик тўғрисида иш қўзғатилди.

“Қарши пахта саноат транс” МЧЖ Косон тумани филиали ишчиси У. Бобомуродовнинг меҳнатга оид ҳуқуқлари бузилиб, иш ҳақлари берилмаётгани тўғрисидаги аризаси юзасидан ўказилган текширишда МЧЖ раиси Н. Равшановга нисбатан иш қўзғатилди. Ўрганиш жараёнида прокуратура аралашуви билан филиалда ишлаб келаётган 13 нафар ишчининг тўланмаган жами 12.3 млн сўмлик иш ҳақлари тўлаб берилиши таъминланди.

Бундан ташқари, А. Ўринов ва бошқаларнинг “Қамаши пахта тозалаш” АЖ маъмурияти томонидан маош берилмаётгани ҳақидаги мурожаатини ўрганишда жамиятга қарашли “Тўқбой” пахта қабул қилиш масканида ишловчи 12 ходимнинг 7.5 млн сўмлик иш ҳақлари тўланмасдан келинаётганлиги аниқланиб, уларга тегишли пуллар тўла ундириб берилди.
Касби тумани Месит қишлоғида яшовчи Ш. Рўзибоев ва Ҳ. Йўлдошеваларнинг Муборак тумани “Геолог Агротехсервис” МЧЖдан иш ҳақларини ундириб бериш ҳақидаги мурожаатини кўриб чиқиш натижасида уларнинг жами 5.879 млн сўмлик иш ҳақлари ундириб берилди.

Шунингдек, “Турон” фермер хўжалиги раиси О. Худойқуловнинг “Қашқадарёнефтгазсаноатқурилиш” АЖ томонидан шартнома шартлари бажарилмаётгани тўғрисидаги мурожаати асосида АЖ ҳисобидан 13.5 млн сўмлик қарздорликни ундириш тўғрисида вилоят хўжалик судига даъво аризаси киритилди.