Қозоғистон ва Покистон саноат, фан ва фармацевтика бўйича ҳамкорлик қилади. Бу ҳақда Покистон бош вазири Навоз Шарифнинг Қозоғистон президенти Нурсултон Назарбоев билан музокаралари якунларига кўра берилган брифингда айтилди.
Эслатиб ўтамиз, у кеча Қозоғистонга расмий сафар билан ташриф буюрди.

“Биз фан, иқтисодиёт, транспорт ва ҳаво алоқалари соҳаларида икки томонлама ҳамкорликни ривожлантиришга келишиб олдик”, - унинг сўзларини келтиради РИА Новости агентлиги.
Назарбоев, ўз навбатида, асосий эътибор транспорт алоқаларини ривожлантиришга қаратилишини, бу ўзаро товар айланмасининг ўсишига олиб келишини таъкидлади.
“Қозоғистоннинг “Нурли жўл”, Хитойнинг “Ипак йўли иқтисодий камари” дастурлари, шунингдек, Қорақурум йўли давлатлар ўртасидаги ҳамкорликнинг фаоллашувига олиб келади. Шу билан бирга, Қозоғистон-Туркманистон-Эрон темир йўли Покистоннинг денгиз портларига чиқиш имкониятини яратиб беради.

Буларнинг бари савдо ва иқтисодий алоқаларни ривожлантиришга ёрдам беради”, - деди Қозоғистон раҳбари.
Шунингдек, саноат, фармацевтика, энергетика, фан ва ҳарбий-техник соҳалардаги конкрет лойиҳалар бўйича келишувга эришилгани маълум қилинди.