Бошқирдистонда ўқувчиларнинг ҳар кунги рационига асал қўшилиши мумкин, деб хабар бермоқда ТАСС ахборот агентлиги. Бундай таклифни республика раҳбари Рустам Ҳамитов билдирган. 

“Асал мактаб таомномасига киритилиши мумкин, ўқувчиларга ҳар куни герметик идишга солинган 2-5 грамм асал бериш режалаштирилмоқда”, деб айтди журналистларга Ҳамитовнинг матбуот котиби Артём Валиев.

Валиевнинг айтишича, асал етказиб берувчи ташкилот сифатида “Башкирские пасеки” компанияси танланди. Компанияда таъкидланишича, асал айнан кимнинг ҳисобига – давлат ёки ота-оналарнинг ҳисобига берилиши масаласи кўриб чиқилмоқда.

Ҳамитовнинг таклифини Бошқирдистон пойтахти – Уфага ишчи ташриф билан келган Бутунжаҳон асаларичилик уюшмалари федерацияси раҳбари Жиль Ратиа қўллаб-қувватлади. Ратианинг айтишича, бу Бошқирдистонда асаларичиликнинг ривожланишига ёрдам беради ва болалар учун энг яхши диетани шакллантиради. Ратианинг таъкидлашича, озгина миқдордаги асал шакардан кўра анча фойдалироқдир.