Британияда эримайдиган музқаймоқ кашф этилди, дея хабар берди The Mirror нашри. Ушбу музқаймоқ Стаффордшир графлигидаги Alton Towers кўнгилочар боғида сотилади.

Нашрнинг қайд этишича, музқаймоқнинг тайёрланиш усули сир тутилмоқда. Фақатгина унга ҳарорат билан ишлов берилиши айтиб ўтилган.

Ширинлик бош ошпаз Хестон Блюментал томонидан ўтказилган синовлар натижасида пайдо бўлди. У ўзининг “Ёғли ўрдак” ошхонасидаги ноодатий таомлари билан машҳур. Масалан, қора икрали оқ шоколад, чўчқа гўштидан тайёрланган музқаймоқ, кофе ва саримсоқ пиёзли печенье ҳамда бошқаларни тақдим этган.

2013 йилда Гарвард университети муҳандиси Дэвид Эдвардс ҳам 8 соат давомида эримайдиган музқаймоқ ихтиро қилган эди. Унинг маҳсулоти кокос, ёнғоқ ва ер ёнғоқ шарофати билан эримайдиган ҳолга келган. Айни пайтда бундай музқаймоқлар АҚШ ва Британия супермаркетларида сотилади. Харидорлар WikiPearls номини олган музқаймоқларнинг манго, шоколад ва ванилли турларини тотиб кўришлари мумкин.