27 август куни Вена шаҳрида радикализм муаммоси ва унга қарши кураш масалаларига бағишланган халқаро мусулмон-яҳудий конференцияси очилди. Бу ҳақда Россия яҳудий диний ташкилотлари конгресси сайти орқали маълум қилинди.

Яҳудийлар делегациясига Европа раввинлар кенгаши раҳбари Пинхас Гольдшмидт, мусулмонлар делегациясига эса Европа ислом ташкилотлари федерацияси директори Иброҳим ал-Зиёт бошчилик қилишди.

“Бугун Европа эсктремизм билан боғлиқ муаммолар ўчоғида қолди. Биз Европадаги даҳшатли терактларни эслаймиз: Парижда “Шарли Эбдо”, Копенгагенда синагога, яқинда эса Амстердам-Париж поездидаги отишма. Раввинлар ва имомлар бугуннинг долзарб масалалари ечимига биргаликда ёндашиши керак. Энг жиддий таҳдид, шубҳасиз, ИШИДдир. Уни соатли бомба деб аташ мумкин”, - деди Гольдшмидт. Унинг сўзларига кўра, халқларнинг хавфсизлигини таъминлашда конфессиялараро мулоқот муҳим ўрин тутади.

Экстремизм масалаларидан ташқари, тадбирда диний ҳуқуқларнинг таъминланиши масаласи ҳам кўтарилади. ЕИнинг айрим давлатларида турли конфессияларнинг ҳуқуқларини чекловчи қонунчилик актлари қабул қилинмоқда ёки муҳокамага қўйилмоқда, бу эса диний амалларни бажаришга жиддий тўсқинлик қилмоқда. Булар сирасида диний либос кийиш ва диний маросимларни бажариш тилга олиб ўтилди.