Канада атроф-муҳитни муҳофаза қилиш агентлигида ишлаган эколог Тони Тернер мамлакат бош вазири Стивен Харперни ҳақоратловчи қўшиқ куйлагани учун ишдан бўшатилди. Бу ҳақда The Guardian нашри хабар берган.

Ушбу олим ўзининг асосий ишидан ташқари фейсбукига фолк йўналишидаги ҳаваскорона қўшиқларини жойлаштириб бориш билан ҳам шуғулланган.

Унинг навбатдаги қўшиғи Harperman деб номланиб, у бу қўшиқни хор жўрлигида гитарасини чалган ҳолда ижро этган. Қўшиқда бош вазирнинг истеъфоси сўралган жумлалар ҳам мавжуд.

Экология агентлигидаги касаба-уюшмалари вакилининг айтишича, Тернер бу ҳаракати орқали касб одоби қоидаларини бузган. Унинг фикрича, олим бош вазирнинг фаолиятини текширгандан кўра, кўчманчи қушларнинг ҳаракат йўналишларини кузатиши керак эди.

Канада Касб институти давлат хизмати раҳбари Деби Давунинг таъкидлашича, олимни ишга тиклаш бўйича ҳаракатлар амалга оширилади.

Тернер эса ўз фейсбуки орқали бошқа канадаликларни бу қўшиқни биргаликда куйлашга даъват қилишда давом этмоқда.

Маълумот учун, 2 август куни Канада бош вазири парламентни тарқатиб юборганди ва 19 октябрда ўтказиладиган навбатдан ташқари сайлов учун тайёргарликни бошлаганди. Бу сайловолди кампанияси мамлакатнинг замонавий тарихида энг узоқ давом этган сайловолди кампанияси бўлади. Парламент сайловлари 19 октябрда ўтказилади, шу тариқа номзодлар ихтиёрида ташвиқот учун 11 ҳафта ёки 78 кун вақт бўлади.

Бироз олдинроқ, сўровномаларга кўра Стивен Харпер партияси бу сайловолди курашини ютқазаётгани хабар қилинганди.