Польша Мудофаа вазири Томаш Шемоняк болгариялик ҳамкасби Николай Ненчик билан 2 давлатнинг ҳарбий соҳадаги ҳамкорлиги бўйича келишиб олди. Бу ҳақда ВТА агентлиги хабар тарқатган.

Бу келишувга кўра, биринчи навбатда Болгариядаги МиГ-29 русумли 6та қирувчи самолёт таъмирланиши ва Польшанинг замонавий технологиялари билан жиҳозланиши кўзда тутилган.

Ушбу Собиқ Иттифоқ давридан қолган 6та ҳарбий самолёт НАТО талаблари асосида таъмирланиши айтилган. Уларнинг 3таси шу йилнинг ўзида, яна учтаси эса кейинги йилнинг бошида тайёр бўлиши мўлжалланган.

Қайд этилишича, НАТО аъзолари бўлган мамлакатлар камида 12та ҳарбий қирувчи самолётга эга бўлиши лозим. Бу талабнинг бажарилиши мамлакатнинг қуролли кучлари ҳамиша жангавор ҳолатда бўлишини таъминлайди.

Польша ва Болгария мудофаа вазирликлари ўзаро муносабатларда тушунмовчилик ҳолатлари йўқлигини таъкидлашган.
Маълумот учун, Польша НАТО альянси таркибига 1999 йилда, Болгария эса 2004 йилда аъзо бўлган.