Россия спорт вазири Виталий Мутко россиялик енгил атлетикачилар билан содир бўлган ҳодисадан мамлакатга сиёсий босим ўтказиш қуроли сифатида фойдаланилгани маълум қилди. Бу ҳақда “ЭкСпорт” хабар берди.

“Биз миллион доллар ўтказиб берган Жаҳон антидопинг агентлиги ўз сиёсатини ўтказмоқчи. Россиядаги допинг масаласи ҳақида фильм намойиш этилганидан сўнг дарҳол комиссия тузилиши лозим экан. Агарда можаро бошқа мамлакатда содир бўлганида, ҳеч қандай комиссия тузилмас эди. Бу Ғарбнинг сиёсий қуролидан бошқа эмас. Катта сиёсатдагиларнинг ҳеч бири Россия спортининг Собиқ Иттифоқ ўрнини эгаллашини истамайди”, – деди Мутко.

4 августда Халқаро енгил атлетика федерацияси 2011 йилда атлетларнинг биологик паспортидаги допинг қабул қилинган бўлиши мумкинлигига ишора қилувчи аномал маълумотлар асосида 63 ишни қўзғатган эди. Уларнинг 31таси россияликларга нисбатан очилган.

Бундан ташқари, немис телевидениесида ҳам спортда мунтазам равишда допинг қабул қилиш ҳақидаги ҳужжатли фильм намойиш этилган бўлиб, унда россиялик енгил атлетикачилар ҳақида ҳам сўз борган.