Алишер Навоий номидаги кино саройида «Ўзбеккино» миллий агентлиги буюртмаси асосида суратга олинган «Баракасини берсин» номли бадиий фильм тақдимоти бўлиб ўтди. Бу ҳақда УзА хабар берди.

«Кексаларни эъзозлаш йили» Давлат дастури доирасида «Ўзбеккино» миллий агентлиги томонидан табаррук ёшдаги инсонларга ҳурмат-эҳтиром кўрсатиш борасидаги эзгу анъана ва қадриятларимизни акс эттирувчи бир қатор фильмларни яратиш устида қизғин иш олиб борилмоқда.

Истиқлол айёми арафасида тақдим этилган «Баракасини берсин» комедияси улардан бири. Фильм бош қаҳрамонлари Ҳайдар бува ва унинг ҳамсояси Шомирзанинг ҳаёти, қўшнилар ўртасидаги муносабатлар орқали кекса авлод вакилларининг мардлик, инсоф-диёнат, ҳалоллик сингари халқимизга хос фазилатларни ўз шиорига айлантиргани қизиқарли лавҳалар, ҳаётий воқеалар ҳамда завқли эпизодлар ёрдамида очиб берилган.

Ўзбекистоннинг гўзал ва мафтункор табиати, миллий урф-одат ва анъаналаримизни намойиш этувчи ушбу картинада Эркин Комилов, Ражаб Адашев, Фарҳод Абдуллаев, Илмира Раҳимжонова, Толиб Мўминов, Жамила Ғофурова сингари актёрлар асосий ролларни ижро этган.