Суриядаги "ИШИД" жангарилари қадимий шаҳар Пальмирадаги яна бир меъморий обидани, Бэла ибодатхонасини портлатиб юборишди. Бу ҳақда BBC News хабар қилган.

"Бу жуда кенг кўламли вайронкорлик бўлди. Портлаш овози шу қадар кучли эдики, уни ҳатто гаранглар ҳам эшитиши мумкин эди", деб гувоҳлик беради маҳаллий аҳоли вакиллари.

Маълумот учун, Бэла ибодатхонаси милоддан аввалги 1 асрда барпо этилган ва шаҳарнинг энг диққатга сазовор жойларидан бири саналарди.

Бу ибодатхона ўзида Ғарб ва Шарқ меъморчилигининг энг муҳим жиҳатларини мужассамлаштирганди. Сурияда уруш бошланишидан олдин бу ибодатхонани кўриш учун ҳар йили 150 минг нафардан ортиқ сайёҳ ташриф буюрган.

"ИШИД" шу тариқа Пальмира шаҳрида иккинчи марта йирик вайронгарчиликни амалга оширди. 24 август куни жангарилар шаҳардаги Баалшамин ибодатхонасини ҳам портлатиб юборганди.

Унгача эса бу музей-ибодатхона ходими, 84 йшли олим қатл этилганди.

"ИШИД" шу йилнинг май ойида ЮНЕСКО рўйхатидаги бу тарихий шаҳарни босиб олишганди.