Украина парламенти 31 август куни биринчи ўқишда мамлакат конституциясининг децентрализация ҳақидаги моддасини ўзгартириш ҳақида қарор қабул қилгач, Олий Рада биноси олдида бошланган тартибсизликлар давомида жабрланганлар сони 100 нафардан ошди.

Бундан олдинроқ, Рада олдида кучли портлаш натижасида камида 15 нафар милициячи жабрлангани ҳақида хабар берилганди.

Киев шаҳри милицияси бошлиғи Александр Терещукнинг расман маълум қилишича, айни вақтда тўқнашувда жабрланганлар сони 100 нафардан ошиб кетди.  Улардан 4 нафарининг аҳволи оғир. Бу ҳақда 112 Украина хабар қилган.

"Портлашдан кейин кўчада жуда кўп қон тўкилди. Бу портлаш ёки қўл гранатаси орқали, ёки жангларда фойдаланиладиган граната орқали амалга оширилган. Бу масала бўйича аниқлик киритилади", дейди Терещук.

Айни вақтда милиция ва ҳуқуқ-тартибот органлари ходимлари намойишчиларга қарши кўздан ёш сиздирувчи газ қўлламоқда, вазият ўзгармаса кескинроқ чоралар кўрилиши айтилган.