Украина парламенти қаршисида уюштирилган намойиш вақтида кучли портлаш содир этилди ва тартибсизликни тўхтатишга уринаётган милициянинг камида 15 нафар ходими жароҳатланди. Бу ҳақда 112.ua телеканалида хабар қилинди.

Воқеа жойидан жонли равишда эфирга чиққан журналистнинг айтишича, портлашдан кейин йўлда қон кўлмаги пайдо бўлган, баъзи журналистлар ҳам тиббий ёрдамга муҳтож бўлишган.

Бошқа ОАВларда айтилишича, портлаш асоратлари у қадар ваҳимали эмас.

Айни вақтда Олий Рада қаршисидаги Конституция майдонидаги намойишчиларни тарқатиш учун ҳуқуқ-тартибот органлари ходимлари кўздан ёш сиздирувчи газ қўлламоқда.

Намойишчилар эса милиция ва органлар ходимларига қарата шиша идишлар ва тош бўлаклари улоқтиришмоқда.

Намойишчилар парламент биносига бостириб киришни мақсад қилишган. Милиция сафига эса қўшимча кучлар етиб келмоқда ва зарур бўлса кескин чоралар кўрилишига тайёргарлик кўрилмоқда.

Украина ИИВ ходимининг маълумот беришича, намойиш вақтида ўта фаол ҳаракат қилганлардан бири ҳибсга олинган.

ОАВлардан бирининг маълумотига кўра, намойишчи гуруҳлардан бири ўзини ўраб олган милиция кучларини ёриб ўтишга муваффақ бўлган.

Бироз олдинроқ, намойишчилар Рада биносини штурм қилишни бошлагани ҳақида хабар берилганди.