Ўзини "Донецк халқ республикаси" ва "Луганск халқ республикаси" деб эълон қилган Украинанинг икки вилояти Россия миллий валютаси рубль билан ҳисоб-китоб қилишни жорий этганидан сўнг Украина томонидан иқтисодий қамалга олинган эди.

Мазкур масалада фикр билдирган Россия президентининг матбуот котиби Дмитрий Песков журналистларга рубль ҳар қаерда ишлатилиши мумкин бўлган халқаро валюта сифатида ўзининг жозибадорлигини йўқотмайди, деди.

У Донбасснинг Киев томонидан иқтисодий қамал қилинишига рубль асосий сабабчи эмаслигини ҳам айтиб ўтди.

ДХР ҳукумати вакилларидан бирининг маълум қилишича, Донецк ва Луганск вилоятларида 2015 йилнинг куз ойларида гривнадан рубль фойдасига бутунлай воз кечилиши мумкин.

1 сентябрь куни ДХР Халқ кенгаши спикери Андрей Пургин Донбасс украин гривнаси айланмасининг бир қисмини сақлаб қолади, ҳисоб-китобларнинг катта қисмини эса рублда амалга оширади, дея маълум қилди.

Луганск вилоятида эса рубль 1 сентябрдан асосий пул бирлиги сифатида муомалада қўлланила бошланди.