Сешанба, 1 сентябрь куни сўнгги уч савдо сессияси давомида 25 фоизга қимматлаган хом ашё баҳоси яна пастлаш йўлига ўтиб олди, дея хабар берди Bloomberg агентлиги.

Тошкент вақти билан 10:00да тузилган октябрь ойи шартномаларида Brent русумли нефтнинг бир баррели (159,988 литр) баҳоси 3 фоиз ёки 52,57 долларгача пасайди.

Октябрда етказиб берилувчи WTI тоифали хом ашё нархи ҳам 3 фоизга арзонлаб, бир баррел учун 47,68 доллардан таклиф қилинди.

Сешанба куни АҚШ нефть захиралари тўғрисидаги янги маълумотлар эълон қилиниши лозим. Таҳлилчилар эса захираларнинг ортиши мумкинлигини башорат қилмоқда. Бу эса, ўз навбатида хом ашё нархининг арзонлашувига олиб келди.

ОПЕК бошқа нефть қазиб олувчилар, шу жумладан, АҚШ ва Россия билан хом ашё қазиб олишни қисқартириш ҳақида битим имзолаши тўғрисидаги хабарлардан сўнг нефть баҳосининг қимматлаши кузатилган эди.

Бироқ бозор иштирокчилари нефть қазиб олишни қисқартириш борасида жуда кам аломатлар борлигини айтиб ўтишган.

Сўнгги уч савдо сессиялари вақтида нефт нархининг 25 фоизга ортиши эса ўтган асрнинг 90-йилларидан кейинги рекорд даража ҳисобланади.