Россия ва Хитой Москва-Қозон юқори тезликдаги темир йўл магистралининг қурилиши лойиҳасига 1 трлн рубль миқдорида инвестиция киритишни режалаштирмоқда. Бу ҳақда Россия президенти Владимир Путин баёнот берди.

Унинг сўзларига қараганда, юқори тезликдаги магистралнинг қурилиш Россия ва Хитой алоқаларининг энг истиқболли йўналишларидан биридир. “Лойиҳанинг биргаликда молиялаштиришнинг механизмлари борасида келишувга эришиб бўлинди, ушбу қурилишга биз 1 трлн рубль инвестиция киритмоқчимиз”, - унинг сўзларини келтиради Интерфакс агентлиги.

Бундан ташқари, Путин Россияга қарши Украина масаласи туфайли Ғарб давлатлари томонидан жорий қилинган иқтисодий ва сиёсий чекловлар Россия ва Хитойнинг иқтисодий муносабатларига ижобий таъсир ўтказиб, ўзаро алоқаларнинг мустаҳкамланишига туртки бўлаётганини таъкидлаб ўтди.
Магистрал қурилиши 2020 йилда якунланади.