Хитой 3 сентябрь куни Иккинчи жаҳон урушидаги ғалабанинг 70 йиллиги муносабати билан ўтказиладиган парад арафасида Пекин шаҳри кўчаларини қушлардан тозалаш учун маймунлардан фойдаланади. Бу ҳақда The Independent хабар берган.

Айни вақтда Хитой Қуролли кучлари шу мақсадда маймунлар отрядини тайёрламоқда.

Ташкилотчилар бу орқали парад вақтида қушларнинг самолётларга урилиши эҳтимолининг олдини олишга умид қилишмоқда.

Пекин шаҳри ҳукумати аҳолига шу кунларида ўз капутарларини осмонга учиришни тақиқлаб қўйган.

Эслатиб ўтамиз, ҳарбий парад ва маросимлар 3 сентябрь куни ўтказилади. Унда дунёнинг 30га яқин давлати раҳбарлари иштирок этишади.

Ўзбекистон президенти Ислом Каримов бу парадда қатнашиш учун 2 сентябрь куни Хитойга жўнаб кетиши маълум қилинганди.

Шу куни Тяньаньмэнь майдонидан 12 минг аскар ва зобит парад билан ўтади. Парадга, шунингдек, 200 донадан ер усти техникаси ва самолёт жалб қилинади.

Парадни тайёрлашга раҳбарлик қилаётган генерал-майор Цюй Жуйнинг маълум қилишича, парадда иштирок этадиган техниканинг 84 фоизи биринчи марта намойиш этилади.