Август ойида Сальвадорда зўравонлик энг юқори чўққига кўтарилди. Миллий полиция раҳбари Маурисио Рамирес Ландаверденинг маълум қилишича, ўтган ойда 900 нафардан зиёд фуқаро қотиллик қурбони бўлган. Айрим башоратларга кўра, 2015 йил ҳисобидан мамлакатнинг 6,3 миллион фуқаросидан 6 мингдан зиёди зўравонлик қурбонига айланиши мумкин.

“Бу жуда оғир ой бўлди. 907 марта қасддан қотиллик содир этилган. Мазкур жиноятларнинг 10 фоизида болалар қотиллар қурбонига айланган”, – деди Ландаверде.

Унинг қайд этишича, ҳалок бўлганларнинг аксарият қисми, шу жумладан, вояга етмаганлар кўчадаги турли жиноий тўдалар томонидан ўлдириб кетилган. Адлия вазири Беното Ларанинг таъкидлашича, август ойида қотилликларнинг авж олишига асосан жиноий тўдалар ўртасидаги ўзаро тўқнашувлар ҳамда уларга қарши ҳуқуқни муҳофаза қилиш органлари томонидан олиб борилган амалиётлар сабаб бўлган.

Маълумотларга кўра, Сальвадорда жиноий тўдалар аъзолари 70-75 минг нафарни ташкил этади. Мамлакат қуролли кучлари сони эса улардан бор-йўғи икки баробарга ортиқ. У ердаги “Мара Сальватруча” ҳамда “Баррио 18” жиноий тўдалари нафақат Сальвадор ҳудудида, балки Марказий Американинг бошқа мамлакатларида ҳам таъсир кучига эга.

Август ойи сўнгида Юқори суд томонидан “террористик тўдалар” дея эълон қилган жиноий уюшмалар ҳаракати туфайли кўплаб сальвадорликлар ўз уйини ташлаб, ҳаттоки мамлакатни тарк этишга мажбур бўлмоқда. Биргина 2014 йилда 280 минг киши жиноятчилик ва босқинчилик ўсиб кетгани сабабли бошқа давлатларга кўчиб кетган.