Англия терма жамоаси собиқ яримҳимоячиси Дэвид Бекҳэм ўзининг имзоси туширилган «Арсенал» клуби футболкасини 10 минг фунт стерлингга сотиб олди. Бу ҳақда The Daily Mail нашри хабар тарқатди.

Бекҳэм мазкур либосни Лондондаги хайрия тадбири доирасида 1 сентябрь куни 13 ёшга тўлган ўғли Ромеонинг туғилган кунига совға сифатида сотиб олган. Ромео «Арсенал» клуби мухлиси бўлиб, сўнгги уч йил давомида «канонирлар» футбол академияси шуғулланган ва жорий йилнинг февралида у ердан ҳайдалганди.

Мазкур хайрия тадбири доирасида жами 7 миллион фунт стерлинг маблағ йиғилди. Тадбирдан йиғилган пуллар турли хил оғир хасталикка чалинганларни музикотерапия орқали даволаш учун сарфланиши кўзда тутилган.

Маълумот учун, Дэвид Бекҳэм ўз вақтида Англиянинг «Манчестер Юнайтед», Испаниянинг «Реал», Италиянинг «Милан», Франциянинг «ПСЖ» ва АҚШнинг «Лос-Анжелес Гэлакси» клублари сафида тўп сурган. Англия терма жамоаси сафида эса 115та ўйинда майдонга тушиб, 17 бор рақиблар дарвозасини ишғол қилишга муваффақ бўлган. 2013 йилнинг май ойида футболчи фаолиятини якунлагани ҳақида эълон қилганди.