Молдава чемпионатнинг 6-туридан ўрин олган "Шериф" ва "Зимбру" жамоалари ўртасидаги марказий баҳсни бошқариб борган ҳакам Сергей Деренов қўпол хатолари учун умрбод ҳакамликдан четлатилди. Бу ҳақда Молдова футбол федерацияси расмий сайти хабар тарқатди.

"Шериф" ва "Зимбру" жамоалари ўртасидаги учрашув 29 август куни бўлиб ўтган ва баҳс "Шериф"нинг ғалабаси билан тугаган — 2:1. Биринчи бўлим сўнгида ҳакам "Зимбру" ўйинчисини майдондан четлатиб, 60-дақиқада "Шериф" дарвозасига пенальти белгилаган.

2 сентябрь куни Молдова футбол федерацияси ҳакамлар қўмитаси "ўйиндаги қўпол ва кўплаб хатолар" туфайли Дереновни умрбод ҳакамликдан четлатди. Шунингдек, Молдова футбол федерацияси Дереновни ФИФА ҳакамлари рўйхатидан чиқариб ташлашга тавсия қилди.