Осло шаҳри суди Норвегиянинг интернет-провайдерларига еттита энг оммавий файл алмашиш учун мўлжалланган сайтларга киришни тўсиб қўйиш мажбуриятини қўйди, деб хабар бермоқда Torrent Freak. 

Норвегия ва АҚШ киностудиялари ва овоз ёзиш компаниялари судга ушбу ҳолат юзасидан шикоят аризаси топширишди ва уларнинг илтимоси қондирилди.

Бу Норвегияда интернетдаги қандайдир маълумот қонунчилик билан чекланаётган биринчи ҳолдир.

Провайдер компаниялар вакиллари бу қарор бўйича ҳеч қандай эътирозлари йўқлигини айтдилар. Тақиқлов Pirate Bay, Extra Torrent, Viooz ва Movie4k каби порталларига қўлланмоқда.

Норвегия Либерал партияси раҳбари Трине Скей Гранде бундай қарорлар мамлакат қонунчилигига хавф туғдиришини таъкидлаб ўтди. Унинг фикрича, бундан чоралар охир-оқибат фуқаролар эркинлиги ва ҳуқуқларининг чекланишига олиб келиши мумкин.

Суд барча етти қароқчи сайт эгаларига Норвегия ҳуқуқ эгалари уюшмасига 1,7 млн крон миқдорида суд билан боғлиқ харажатларни қоплаш мажбуриятини қўйди. Бу уюшмага норвег студияларидан ташқари АҚШнинг Disney, Warner Bros. ва Universal киностудиялари ҳам киради.