2015 йил 2 сентябрда Вьетнамда 1945 йил 2 сентябрда Хо Ши Мин мамлакатнинг француз мустамлакачилик тартибидан озод бўлиши муносабати билан мустақиллик декларацияси ва Вьетнам демократик республикаси ташкил этилганини эълон қилганига 70 йил тўлди.

2 сентябрда Ханойдаги Бадин майдонида Вьетнам мустақиллиги куни ва Август инқилобидаги ғалабанинг 70 йиллигини нишонлаш маросими бўлиб ўтди. Маросим давомида ҳарбий парад ва халқ қуролли кучлари, аҳолининг турли қатламларининг 30 мингга яқин вакиллари иштирокида намойиш бўлиб ўтди.

Шу муносабат билан Россия президенти Владимир Путин Вьетнам ҳукуматига ўз табригини йўллади, деб хабар бермоқда Кремль матбуот хизмати.

“Россия раҳбари Вьетнамнинг ижтимоий-иқтисодий ва илмий-техникавий ривожланишдаги, унинг дунё майдонидаги мустаҳкам ўрнига юқори баҳо берди”, дейилмоқда хабарда.