Буюк Британия бош вазири Дэвид Кэмерон мамлакат суриялик муҳожирлар инқирозини ҳал қилиш мақсадида яна 100 млн фунт инсонпарварлик ёрдами ажратишини маълум қилди, деб хабар бермоқда Reuters ахборот агентлиги.

“Мен шуни маълум қилишим мумкинки, биз яна 100 млн фунт тақдим қиламиз. Бу сумма билан қўшиб ҳисобланганда бизнинг умумий ёрдамимиз 1 млрд фунтдан кўпроқни ташкил қилади. Бу Буюк Британия томонидан гуманитар инқирозни ҳал қилиш учун ажратилган энг катта молиявий кўмакдир”, деб айтди Кэмерон.

Кэмероннинг таъкидлашича, бу маблағлардан 60 млн фунти ўз юртида қолган Сурия аҳолисига ёрдам сифатида ажратилади. Қолган 40 млн фунт Сурияга яқин давлатлар – Туркия, Иордания ва Ливанга йўналтирилади. Кэмероннинг айтишича, айнан шу давлатларда ҳозирда сурияликлар аҳолининг тўртдан бир қисмини ташкил қилмоқда.