Франциянинг Ўзбекистондаги элчихонаси 2015 йил 4 сентябрь — Қорақалпоғистон санъат музейи асосчиси Игорь Савицкий таваллудининг 100 йиллиги муносабати билан унинг хотирасига ҳурмат изҳор қилди.

“Саҳродаги Лувр” номини олган Қорақалпоғистон санъат музейи ўзининг бой коллекцияси билан дунёдаги энг эътиборли музейлардан саналади.

Франциянинг Тошкентдаги элчихонаси бунда 31 йил давомида музей раҳбари сифатида фаолият кўрсатган Мариника Бабаназарованинг меҳнатлари беқиёс эканини қайд этиб ўтди.

“Музейнинг барча ходимлари қўллаб-қувватлаши билан унинг қиймати сақланиб, Нукус музейида асраб-авайланаётган бебаҳо хазина Ўзбекистонга ҳам, унинг ташқарисига ҳам танилди”, – дейилади элчихона матбуот хизмати хабарида.

Маълумот ўрнида, 1998 йили Франциянинг Кан (Caen) музейида Нукус музейи коллекциялари намойиши бўлиб ўтган эди.

Бундан ташқари, Франция элчихонаси кўмагида Мариника Бабаназарованинг Игорь Савицкий ҳаёти ва фаолиятига бағишланган асари француз тилида чоп этилган. Касбий маҳорати, Франция билан шерикчилик алоқаларини ривожлантиришга қўшган ҳиссаси инобатга олинган ҳолда, 2013 йил июль ойида Мариника Бабаназарова “Санъат ва маданият соҳасига қўшган ҳиссаси учун” Франция Маданият вазирлигининг асосий мукофоти — Кавалер Ордени мукофоти билан тақдирланган.

Аввалроқ, 28 август куни эса Ўзбекистон Миллий хавфсизлик хизмати музейдаги умумий қиймати 581,625 млн сўмни ташкил этувчи бешта суратнинг йўқолгани ҳолати бўйича жиноий иш қўзғатгани хабар қилинган эди.