Мисрнинг жанубида жойлашган Сўҳага вилоятида юзлаб радикал исломчилар 2013 йилнинг ёзида зўравонлик қилгани ва черковни ёқиб юборгани учун умрбод ва узоқ муддатли қамоқ жазосига тортилди. Бу ҳақда “Ал-Яум ас-Сабиа” газетаси сайтида маълум қилинди. 

Вилоятнинг жиноий суди 31 нафар айбланувчига умрбод қамоқ жазоси (Мисрда 25 йилга тенг) тайинлади. Яна 57 нафар судланувчи 15 йилга, 31 нафари 10 йилга қамоққа юбориладиган бўлди.

Аксарият қисми “Мусулмон биродарлар” ислом уюшмаси аъзолари бўлган 119 нафар айбланувчидан 68 нафари бевосита судда иштирок этди. Қолганлари эса қочқинликда юрибди. Умрбод ва 15 йиллик қамоқ жазосига тортилган судланувчилар Авлиё Георгий черкови ва икки йил аввал вайронагарчиликлар уюштирган бошқа жойлардаги мол-мулкни ёқиб юборганлари, вайрон қилганлари ва талаганлари учун товон пули тўлайдиган бўлди.

Қораловчи томон айбланувчиларга черковни ёқишдан ташқари ўқотар ва совуқ қуролга эгалик қилиш ва 15 кишини қасддан ўлдириш айбини ҳам қўйди.