ХХР давлат кенгаши президентининг ўринбосари Ван Ян Россия президенти Владимир Путинга машҳур америкалик актёр Стивен Сигал билан рингга чиқишни таклиф қилди. Бу ҳақда Интерфакс агентлиги хабар бермоқда.

Россия президенти 4 сентябрь куни Русский оролидаги океанариумга ташриф буюрганида уни Приморье губернатори Владимир Миклушевский Хитой делегацияси ва Сигал кутиб олишди. Бинога кириш чоғида Ван Ян Путин ҳам, Сигал ҳам яккакурашларга қизиқишини эсга олиб, уларга рингга тушиб, куч синашиб кўришни таклиф қилди.
“Мен рози бўлмасдим”, - ҳазиломуз жавоб берди Путин.

Путин дзюдо билан 11 йилдан буён шуғулланиб келади. 2006 йили у Европа дзюдо иттифоқининг фахрий президентига айланди, 2010 йилда эса Жанубий Кореянинг Ёнин университетидан “Дзюдо соҳаси доктори” фахрий дипломини олди.