Россия президенти Владимир Путин Украинада муҳим давлат лавозимларининг чет элликлар томонидан эгалланишини ушбу мамлакат халқи учун ҳақорат деб баҳолади. Бу ҳақда у Шарқий иқтисодий форум чоғида баёнот берди.

“Илгари ҳам айтганимдек, Украинани ташқи бошқарувга ўтказиб қўйишди. Ҳукуматдаги барча асосий лавозимлар, асосий вилоятлардаги бош мансабларни ҳам чет элликлар эгаллаб олди. Мен буни украин халқи учун ҳақорат деб ҳисоблайман”, - деди у.
“Нима, Украинада олийжаноб, ҳалол ва саводли бошқарувчилар йўқми? Албатта бор”, - таъкидлади Путин.
Украина бундан кейин қандай йўлдан ривожланиши ҳақидаги саволга жавоб бераркан, Россия етакчиси бу Украинанинг ўзига боғлиқ эканлигини эътироф этди.

Шунингдек, у Украина билан боғлиқ бошқа бир қатор масалаларга, жумладан, конституцияга киритилган янги ўзгартишларга ўз муносабатини билдириб ўтди.
“Бу ўзгартишлар ҳокимият учун курашни ўткирлаштириш учун қўлланмоқда. Мамлакат келажаги унинг халқи бу тартибсизликка қанча чидашига боғлиқ”, - деди у.