Британия ва Австралиянинг Rio Tinto компанияси Наманган вилоятининг Ғова қишлоғидаги объектда олиб борилаётган геология-разведка ишларинининг иккинчи босқичини тугаллади. Бу ҳақда Trend нашри хабар бермоқда.

“Разведка натижалари таҳлил қилиб чиқилади, 2015 йил охирида Rio Tinto Ўзбекистондаги кейинги фаолияти ҳақида қарор қабул қилади. Компания лицензион келишувда назарда тутилган барча молиявий мажбуриятларини бажаради”, - деди Ўзбекистон давлат геология ва минерал ресурслар қўмитаси вакили.
2012 йил ноябрида Ўзбекистон президенти “Наманган вилоятидаги Ғова майдонида геологик ўрганиш ишларини олиб бориш бўйича лойиҳани амалга ошириш тўғрисида”ги қарорни имзолаган эди.

Ўша йилнинг сентябрида Rio Tinto Наманганда мис конларида разведка ишлари олиб бориш учун 5 йилга лицензия олди. Лойиҳа Rio Tinto’нинг бўлинмаси бўлган GAVA EXPLORATION МЧЖ томонидан амалга оширилади.
Компаниянинг 3 йиллик геологик разведка дастурига 2013-2015 йилларда 3 млн доллар сарфланади.