Россияда коррупциянинг ўсиши коррупцион айланманинг ЯИМнинг 54 фоизига тенглашишига олиб келди. Илгариги “рекорд” 52.6 фоизни ташкил этган бўлиб, 2012 йилда қайд қилинган эди. Бу ҳақда “Тоза қўллар” Бутунроссия аксилкоррупцион жамоат қабулхонасининг ҳисоботида айтилди.

“Коррупция даражасининг ўсишига иқтисодий инқироз, иқтисодиётни назорат қилишга, сўз ва жамот ташкилотлари фаолияти эркинлигини чеклашга қаратилган қонунларнинг қабул қилиниши муносабати билан давлат органларида бюрократия даражасининг ошиши ҳам таъсир қилди, - дейилади ҳисоботда. – Порахўр инқироз шароитида жамоатчилик олдида жавобгарликдан қочиш имкониятига эга бўлди, жамиятнинг қўлидаги давлат институтларини назорат қилиш механизмлари қисқарди, бу коррупциянинг ўсиши учун қўшимча шароитлар яратиб берди”.

Экспертларнинг таъкидлашича, ўртача пора нархи мамлакатда ҳисобот даврида 3 баробарга ошган – 218 минг рублдан 613 минг рублга етган. Бу ўсиш асосан рубль девальвацияси билан боғлиқ, негаки долларда бериладиган пора нархи фақат 40 фоизга ошиб, 9.44 минг долларни ташкил қилган.